دُعَاء نُدْبَة

શરૂ કરૂ છું અલ્લાહના નામથી જે રહમાન અને રહીમ છે તમામ વખાણ તે અલ્લાહ માટે કે જે તમામ દુનિયાઓનો પરવરદિગાર છે, અય અલ્લાહ બહેતરીન રહેમતો અને ખાસ સલામ તારા પ્યારા નબી, અમારા સરદાર અને મૌલા, હઝરત મોહંમદ મુસ્તુફા સ. અને તેમની પાક ઔલાદ ઉપર નાઝીલ ફરમાવ (સલવાત). અય મારા અલ્લાહ! તારા વખાણ છે તે તમામ ફેસલા ઉપર કે જે તારા વલીયો વિષે કર્યા છે, તેમને તારા અને તારા દીન માટે ચૂંટેલ છે, તેમને એવી નેઅમતો આપી કે જે હંમેશા બાકી રહેવાની છે જે ન તો ખતમ થશે કે ઓછી, આવું ત્યારે બન્યું કે જ્યારે તું તેમનાથી આ દુનિયાના હોદ્દાઓ તેમજ તેની ખોટી શાનો શૌકત અને દુનિયાની સજાવટથી દૂર રહેવાનું વચન લીધુ ં, તેઓ આ શરતને કબૂલ કરી, તું જાણતો હતો કે તેઓ વચનને પૂરૂં કરશે, તેથી તું પણ તે લોકોને પોતાની નજીક કરી લીધા, તેમના મરતબાને બુલંદ કરીને સાફ શબ્દોમાં વખાણ કર્યા, તેમની પાસે ફરીશ્તાઓને મોકલાવ્યા, વહી નાઝીલ કરીને ઇઝ્ઝત અતા કરી, તેમજ તેમને તારૂં ઇલ્મ આપ્યું, તારા સુધી પહોંચવાનો અને તારી ખુશી હાસિલ કરવાનો વસીલો બનાવ્યો, તેમાંથી (હઝરત આદમ અ. ને) જન્નતમાં જગ્યા અતા કરીને ત્યાંથી દુનિયામાં મોકલાવ્યા, (હઝરત નૂહ અ. ને) કશ્તીમાં સવાર કર્યા તથા ડૂબવાથી તેમને અને તેમના સાથે જે સવાર હતા તેઓને તારી રહેમત થકી હલાકતથી બચાવ્યા, (હઝરત ઈબ્રાહીમ અ. ને) પોતાના દોસ્ત બનાવ્યા, બીજા જે તારી પાસે સાચી ઝબાનનો સવાલ કર્યો તો તું તેમની દુઆ કબૂલ કરી અને બૂલંદ દરજ્જો અતા કર્યો. હઝરત મુસા અ. સાથે ઝાડ થકી વાત કરી અને તેમની મદદ માટે તેમના ભાઈ હારૂનને મદદગાર બનાવ્યા, હઝરત ઈસા અ.ને વગર બાપે પૈદા કર્યા, સાથે સાથે ઘણા મોઅજીઝા પણ અતા કર્યા, રૂહુલ કુદ્સ થકી તેમને તાકત અતા કરી, તે દરેક માટે એક શરીઅત અને રસ્તો નક્કી કર્યો, તેમના માટે વસીઓ બનાવ્યા જેથી તારા દીનને બાકી રાખવા માટે એક ઝમાનાથી બીજા ઝમાના સુધી શરીઅતની હિફાઝત કરતા રહે, જેથી તારા બંદાઓ ઉપર હુજ્જત તમામ થઇ જાય, અને હક તેની સાચી જગ્યાએથી હટી ન જાય, તથા બાતીલ હક ઉપર ફાવી ન જાય, કોઈ એ ન કહી શકે કે કાશ અમારા પાસે કોઈ ડરાવનાર રસુલ આવ્યા હોત યા અમારા માટે કોઈ રહેબર હોત તો આ અઝાબની ઝીલ્લત અને નાબૂદી પહેલાં જ તારી આયતો (નબીઓ) ઉપર ઈમાન લાવ્યા હોત, આ હિદાયતોનો સીલસીલો ચાલતો રહ્યો, ત્યાં સુધી કે તારા હબીબ અને તારા બુઝુર્ગ બંદા હઝરત મોહંમદ મુસ્તુફા સ. ને હિદાયતની ઝીમ્મેદારી સોંપી, અય અલ્લાહ મોહંમદ સ. અને આલે મોહંમદ અ. ઉપર રહેમત નાઝીલ ફરમાવ (સલવાત). તેઓ તેવાજ સરદાર છે કે જેમને તમામ મખલુકમાંથી પસંદ કર્યા, તમામ ચૂંટાએલા બંદાઓમાંથી ચૂંટી લીધા, તેમને તમામ ખાસ બંદાઓમાથી સૌથી અફઝલ બનાવ્યા. ખાસ લોકોમાં પણ તેમને સૌથી વધારે બૂલંદી અતા કરી, તેમજ તમામ નબીઓના રહેબર બનાવ્યા, તેમને તમામ ઇન્સાન અને જીન્નાતોની હિદાયત માટે મોકલાવ્યા, પૂર્વ અને પશ્ચિમ ને તેમના કબઝામાં આપ્યું, (મેઅરાજ માટે) બુરાકની સવારીને તેમની ફરમાબરદાર બનાવી, ખુદા તેમને શરીર અને રૂહ સાથે આસમાનની બૂલંદી સુધી લઇ ગયો, અને દુનિયામાં પહેલેથી છેલ્લે સુધી જે થવાનું હતું તેનું ઇલ્મ અતા કર્યું, તેમને દબદબો પણ અતા કર્યો, તેમની આજુબાજુ જીબ્રઈલ, મીકાઈલ અને ખાસ ફરીશ્તાઓને હિફાઝત માટે નક્કી કર્યા, અને હઝરત મોહંમદ મુસ્તુફા સ.થી વાયદો કર્યો કે તમારા દીનને બધાજ દીનો ઉપર ગાલીબ બનાવી દઈશ ભલે પછી મુશરીકોને ખરાબ જ કેમ ન લાગે? આ ત્યારે થયું કે જ્યારે હિજરત પછી તેમના ખાનદાનને સચ્ચાઈનો દરજ્જો અતા કર્યો. ખુદા તેમના અને તેમના સાથીઓ માટે પહેલું ઘર કાબાને બનાવ્યું, જે મક્કામાં છે. જે તમામ માટે હિદાયત અને બરકતનું કારણ છે, આ ઘરમાં જાહેરી નિશાનીઓ છે, જેમાંથી એક મકામે ઈબ્રાહીમ છે. જે તેમાં દાખલ થયો તેને અમાન મળી ગઈ. પછી ફરમાવ્યું કે 'અય અહલેબય્તે રસુલ! અલ્લાહનો ફક્ત અને ફક્ત એ ઈરાદો છે કે તમારાથી દરેક બૂરાઈને દૂર રાખે અને એ રીતે પાકો પાકીઝા રાખે જેવો પાક રાખવાનો હક છે,' ત્યાર પછી હઝરત મોહંમદ સ. ની મહેનતો અને તકલીફોના અજ્રને કુરાને મજીદમાં અહલેબય્ત અ. ની મોહબ્બતને બયાન કરતા ફરમાવ્યું કે 'અય રસુલ! કહી દો કે હું રીસાલતના કામોના બદલામાં મારા અહલેબય્ત અ. ની મોહબ્બત સિવાય બીજો કોઈ બદલો નથી ચાહતો,' ત્યાર પછી ફરમાવ્યું કે 'હું જે બદલો માંગ્યો છે તે તો તમારા જ ફાયદા માટે છે,' ફરમાવ્યું છે કે 'હું તમારા થી કોઈ બદલો નથી ચાહતો સિવાય એ કે તમે પરવરદીગારના રસ્તાને અપનાવી લો,' તો આ અહલેબય્ત અ. તારી બારગાહ સુધી પહોંચવા માટે હિદાયત તથા તારી ખુશનુદી હાસિલ કરવાના રસ્તા છે, જ્યારે હઝરત રસુલે ખુદા સ.નો ઝમાનો પૂરો થવા આવ્યો તો તેઓ પોતાના વલી તરીકે હઝરત અલી ઇબ્ને અબી તાલીબ અ. ને પોતાના પછી લોકો માટે હાદી બનાવ્યા, અલ્લાહ રહેમત નાઝીલ કરે તે બંને બુઝુર્ગો ઉપર અને તેમની પાક ઔલાદ ઉપર, કે તે લોકો જ ફક્ત અઝાબે ઇલાહીથી ડરાવનાર હતા, 'દરેક ઉમ્મત માટે એક હાદી હોય છે,' નબી સ. તમામ લોકોના સામે એલાન ફરમાવ્યું કે. મન કુન્તો મૌલાહો ફ હાઝા અલીયુન મૌલા જેનો હું મૌલા છું તેના અલી અ. મૌલા છે, અય અલ્લાહ! જે અલી અ. ને દોસ્ત રાખે તેને તું દોસ્ત રાખ, જે અલી અ. સાથે દુશ્મની રાખે તેને તું દુશ્મન રાખ, જે અલી અ. ની મદદ કરે તેની તું મદદ કર, અને જે અલી અ. ને છોડી દે તેને તું ઝલીલ કર, અને હઝરત રસુલે ખુદા સ. આ પણ ફરમાવ્યું કે 'જેનો હું નબી છું તેના અલી અમીર છે,' એ પણ ફરમાવ્યું કે ' હું અને અલી અ. બંને એક જ ઝાડથી છીએ અને તમામ લોકો અલગ અલગ ઝાડથી છે,' હઝરત અલી અ. ની નીસ્બત પોતાના તરફ એ રીતે આપી કે જેવી રીતે હારૂન અ. ની નીસ્બત હઝરત મુસા અ. સાથે હતી, નબી સ. એ હઝરત અલી અ. ને ફરમાવ્યું કે 'તમારો દરજ્જો મારી નજીક એવો છે જેવો હઝરત હારૂનનો હઝરત મુસા અ. ની નજીક હતો, ફરક એ છે કે મારા પછી બીજો કોઈ નબી નથી,' ત્યાર પછી પોતાની દીકરી તમામ ઔરતોની સરદાર જનાબે ફાતેમા સ. સાથે નબીએ હઝરત અલી અ. ની શાદી કરી, અને તેમના માટી મસ્જીદમાં તે તમામ વસ્તું હલાલ રાખી જે પોતાના માટે હલાલ હતી, મસ્જીદમાં જે દરવાજા ખૂલતા હતા એમના દરવાજા સિવાય બીજા તમામ (સહાબા) ના દરવાજા બંધ કરાવી દીધા. હઝરત અલી અ. ને પોતાનું ઇલ્મ અને હિકમતના ખઝાने અતા કર્યા, અને એલાન ફરમાવ્યું કે 'હું ઇલ્મનું શહેર છું અને અલી અ. તેના દરવાજા છે, જેને શહેરમાં દાખલ થવું હોય તે દરવાજાથી આવે, પછી ફરમાવ્યું કે 'અય અલી અ.! તમે મારા ભાઈ, મારા વસી અને વારસદાર છો, તમારો ગોશ્ત મારો ગોશ્ત, તમારૂં ખૂન મારૂં ખૂન, તમારી સુલેહ મારી સુલેહ અને તમારી જંગ એ મારી જંગ છે, ઈમાન તમારા ગોશ્ત અને ખૂનમાં એ રીતે ભળી ગયું છે કે જે રીતે મારા ગોશ્ત અને ખૂનમાં છે, તમે કાલે કયામતના દિવસે હવ્ઝે કૌસર ઉપર મારા જાનશીન હશો, તમે મારા કરઝને અદા કરશો અને મારા વાયદાને પૂરા કરશો,' અય અલી! તમારા શીઆ અને દોસ્ત ચમકતા ચહેરા સાથે જન્નતમાં નૂરના મિમ્બર ઉપર બેઠા હશે, અને મારા પાડોશી હશે, અય અલી જો તમે ન હોત તો મારા પછી મોઅમીનોની ઓળખાણ પણ ન થઈ શકત, ઈમામ અલી અ. પયગંબર પછી ગુમરાહો માટે હિદાયત અને અંધારામાં નૂર છે, અલ્લાહની મઝબુત રસ્સી અને સીધો રસ્તો છે, ન તો કોઈ તેમનાથી વધીને નબી સ. થી સગપણમાં નજીક છે, ન તો દીનમાં તેમનાથી આગળ છે, ન તો કોઈ તેમના ફઝાએલ સુધી પહોંચી શકે છે, તે બધી જગ્યાએ રસુલે ખુદા સ.ના કહેવા મુજબ ચાલતા રહ્યા, અય અલ્લાહ નબી સ. અને ઈમામ અલી અ. તથા તેમની પાક પાકીઝા ઔલાદ ઉપર રહેમત નાઝીલ ફરમાવ. હઝરત અલી અ. તાવીલે કુરાનના આધારે એ રીતે જેહાદ કર્યો કે લોકોના ખરાબ બોલવાની પરવાહ પણ ન કરી, તેઓ અરબના મોટા મોટા સરદારોને હરાવ્યા, તેમના બહાદૂરોને કતલ કર્યા, અને તેમના વરૂઓ જેવા લોકોને ફના કરી દીધા, તો તેમના દિલોમાં જંગે બદ્ર, ખૈબર અને હુનૈન તથા બીજી જંગોની દુશ્મની ઊભી થઇ, બધા ઈમામ અલી અ. સાથે દુશ્મની કરવા માટે એક મત થઇ ગયા, અને મુકાબલો કરવા માટે તન મનથી એકતા કરી લીધી, હઝરત અલી અ. બયઅત તોડનાર (જંગે જમલવાળા), ઇસ્લામના દુશ્મનો (જંગે સીફ્ફીન વાળા) જે લડવા માટે આવ્યા હતા, અને દિનથી નીકળી જનાર (જંગે નહેરવાન વાળા) ને કતલ કર્યા, જયારે હઝરત અલી અ. ની ઝીંદગીની મુદ્દત પૂરી થઇ તો છેલ્લા ઝમાનાનો ખરાબમાં ખરાબ માણસે આપને કતલ કર્યો, તે જૂના ઝમાનાના ઝાલીમના રસ્તા ઉપર ચાલીને લાઅનતી થયો, ત્યાર પછી હઝરત અલી અ. અને બીજા ઇમામો કે જેઓ એક પછી એક હાદી હતા તેમના વિષે નબી સ.ના ફરમાનનો બીલકુલ ખયાલ ન રાખવામાં આવ્યો, ઉમ્મતે તેમની સાથે દુશ્મની શરૂં કરીને નબી સ.થી કતએ રહેમ કર્યા, તેમની ઔલાદને ખિલાફતથી દૂર કરવા માટે એક મત થઇ ગયા, ફક્ત અમુક લોકો અહલેબય્ત અ. સાથે વફાદારી કરી અને તેમના હકને અદા કર્યો, જે લોકો અહલેબય્ત અ. નો સાથ આપ્યો તેમાંથી અમુક લોકોને કતલ કરવામાં આવ્યા, અમુકને કૈદ કરવામાં આવ્યા, એ લોકો માટે એ જ પ્રમાણે ઈલાહી હુકમ હતો, જેથી તેમને વધારે સવાબ અને ઉંચો દરજો મળી શકે, જ્યારે કે આ ઝમીન તો ફકત અલ્લાહની જ છે, ખુદા તેના બંદાઓમાંથી જેને ચાહે તેને પોતાનો વારસદાર બનાવે છે, અને આખેરત ફક્ત પરહેઝગારો માટે જ છે. આપણો પરવરદિગાર પાક છે તે કોઈનો મોહતાજ નથી, તેનો વાયદો જરૂર પૂરો થશે તેના વાયદાથી ફરતો નથી, તે તાકત વાળો અને હિકમત વાળો છે, અય અલ્લાહ! મોહંમદ સ. અને અલી અ. તે બન્ને ઉપર અને તેમની પાક ઔલાદ ઉપર રહેમત નાઝીલ ફરમાવ, તે બન્ને ઉપર અને તેમના અહલેબય્ત અ. ઉપર જે કઈ મુસીબતો પડી છે તેથી રડવા વાળાઓને તેમના ઉપર રડવું જોઈએ, મોટા અવાજથી રડવા વાળાઓને તેમના ઉપર વિલાપ કરવો જોઈએ, એમના જેવા લોકો ઉપર આંસુ વહાવા જોઈએ, ફરિયાદ કરનારાઓને ચીસો પાડી પાડીને બૂલંદ અવાજથી રડી રડીને કહેવું જોઈએ. અયનલ હસનો, અયનલ હુસૈન અલયહિસ્સલામ ક્યાં છે હસન અ. અને ક્યાં છે હુસૈન અ.? ક્યાં છે ઔલાદે હુસૈન અ.? જેઓ એક પછી એક બધાજ નેક તથા સાચાઓની પછી સાચા છે. ક્યાં ગયા એક પછી એક હિદાયત કરનારા? ક્યાં ગયા પોતાના સમયમાં અલ્લાહ તરફથી ચૂંટાએલા? ક્યાં છે તે ઊગતા સૂરજો? ક્યાં છે ચમકતા ચાંદ? ક્યાં છે ઝગમગતા સિતારાઓ? ક્યાં છે દીનની નિશાનીઓ અને ઈલ્મની મજબૂત બુનિયાદો? ક્યાં છે ખુદાના છેલ્લા નુમાઇન્દા? જે રહેબરોના ખાનદાનમાંથી છે, તેમના વગર દુનિયા ખાલી નથી રહેતી, ક્યાં છે એ હસ્તી કે જે ઝૂલ્મને ઉખાડી ફેકવા માટે તૈયાર છે? ક્યાં છે એ બુઝુર્ગવાર કે જેમનો ગુમરાહો અને દગાખોરોને સીધા કરવા માટે ઇન્તેઝાર થઇ રહ્યો છે? ક્યાં છે એ હસ્તી કે જેમનાથી ઝૂલ્મ અને અન્યાયને જડમૂળમાંથી ઉખેડી ફેકવાની આશા બંધાએલી છે? ક્યાં છે તે ઈમામ કે જેમને વાજીબાત અને સુન્નતોને લાગુ કરવા માટે સાચવી રાખવામાં આવ્યા છે? ક્યાં છે મઝહબ અને શરીઅતને જીવતા કરનાર? ક્યાં છે એ કે જેમનો કુરાનના હુકમોને લાગુ કરવા માટે ઇન્તેઝાર થઇ રહ્યો છે? ક્યાં છે દીનની નિશાની અને દીનદારોને ઝાહેર કરનાર? ક્યાં છે ઝાલીમોની કમર તોડનાર? ક્યાં છે શિર્ક અને નીફાકને જડમૂળથી ખતમ કરનાર? ક્યાં છે ફાસીક, ગુનેહગારો અને બગાવત કરનારને હલાક કરનાર? ક્યાં છે ગુમરાહી અને ઇખ્તેલાફની તમામ વસ્તુઓને મિટાવી દેનાર? ક્યાં છે ગુમરાહી અને મનની મેલી ઈચ્છાઓને ખતમ કરનાર? ક્યાં છે ખોટું અને તોહમતની રસ્સીઓના ટૂકડે ટૂકડા કરનાર? ક્યાં છે હલકા અને નાફરમાનોને હલાક કરનાર? ક્યાં છે દુશ્મનો, ગુમરાહો તથા બેદીનોને જડમૂળથી ખતમ કરનાર? ક્યાં છે દોસ્તોને ઇઝ્ઝત અને દુશ્મનોને ઝલીલ કરનાર? ક્યાં છે લોકોને તકવાની બુનિયાદ ઉપર જમા કરનાર? ક્યાં છે તે અલ્લાહનો દરવાજો કે જ્યાંથી ખુદાની બારગાહ સુધી પહોંચાય છે? ક્યાં છે તે વજહુલ્લાહ કે જેમની તરફ દોસ્તો પોતાની રજૂઆત કરે છે? ક્યાં છે એ કે જેમના થકી ઝમીન અને આસમાન કાયમ છે? ક્યાં છે કામીયાબીના દિવસના માલિક અને હિદાયતના પરચમને લહેરાવનાર? ક્યાં છે નેકીઓ અને ખુશીઓને જમા કરનાર? ક્યાં છે નબીઓ તથા તેમની ઔલાદના ખૂનનો બદલો લેનાર? ક્યાં છે કરબલાના શહીદોના ખૂનનો બદલો લેનાર? ક્યાં છે જેમની ઝૂલ્મ અને તોહમતના મુકાબલામાં મદદ કરવામાં આવશે? ક્યાં છે તે પરેશાન હાલ કે જ્યારે તે દુઆ કરે તો દુઆ કબૂલ થાય છે? ક્યાં છે તે કે જે નેક લોકો અને પરહેઝગારોના હાકીમ છે? ક્યાં છે નબીએ મુસ્તફા સ.ના ફરઝંદ? તથા અલીએ મુર્તઝા અ. ના ફરઝંદ? બાઈઝ્ઝત ખદીજા સ. ના નૂરે નઝર? ફાતેમા કુબરા સ. ના લખ્તે જીગર? મારા મૌલા આપ ઉપર મારા મા-બાપ અને મારી જાન આપની સલામતી અને હિફાઝત માટે કુરબાન થાય, અય ખુદાના સૌથી નજીક સરદારોના ફરઝંદ, અય ઇઝ્ઝતો શરાફતના ફરઝંદ, અય હિદાયત પામેલા ઇલાહી હાદીઓના ફરઝંદ, અય પાક પાકીઝા હસ્તીઓના ફરઝંદ, અય શરીફોમાં શરીફના ફરઝંદ, અય પાકીઝા નફ્સોના ફરઝંદ, અય મહેરબાની અને અતા કરનારાઓના ફરઝંદ, અય ચમકતા ચાંદોના ફરઝંદ, અય રોશન ચિરાગોના ફરઝંદ, અય ઝગમગતા સિતારાઓના ફરઝંદ, અય હિદાયતના ખૂલ્લા રસ્તાઓના ફરઝંદ, અય રોશન નિશાનીઓના ફરઝંદ, અય કામિલ ઉલુમના ફરઝંદ, અય મશહુર સુન્નતોના ફરઝંદ, અય બયાન થએલી દિનની નીશાનીઓના ફરઝંદ, અય મૌજુદ મોઅજીઝાઓના ફરઝંદ, અય ખૂલ્લી દલીલોના ફરઝંદ, અય સિરાતે મુસ્તકીમના ફરઝંદ, અય મોટી ખબરના ફરઝંદ, અય તેના ફરઝંદ કે જે કિતાબે ખુદાના પ્રમાણે અલીયો અઝીમ છે, અય જાહેર નિશાનીઓના ફરઝંદ, અય જાહેર અને રોશન દલીલોના ફરઝંદ, અય તમામ હુજ્જતોના ફરઝંદ, અય ખુદાની વિશાળ નેઅમતોના ફરઝંદ, અય તાહા અને મજબૂત નિશાનીઓના ફરઝંદ, અય યાસીન અને ઝારીયાતના ફરઝંદ, અય તૂર અને આદીયાતના ફરઝંદ, અય તેના ફરઝંદ કે જે (શબે મેઅરાજ) અલ્લાહના એટલા નજીક થયા કે બે કમાન કે તેનાથી પણ વધુ નજીક હતા. અય કાશ કે હું જાણી શકતે કે આપનું રહેઠાણ કઈ જગ્યા ઉપર અને કેટલું દૂર છે? અને તે કઈ ઝમીન છે કે જે આપના મુબારક વજૂદથી રોશન છે? શું તે 'રઝવા' નો પહાડ છે કે પછી વાદીએ 'ઝીતોવા' યા બીજી કોઈ ઝમીન? મારા માટે બહુ જ સખત છે કે મારી બદકિસ્મત આંખો બધાયને તો જોએ પરંતુ આપના દીદારથી મહેરૂમ રહે, મારા કાન ન તો આપણી અવાઝને બુલંદ કે ધીમેથી સાંભળી શકે? કેટલું સખત છે કે ચારો તરફ આપને બલાઓ અને મુસીબતો ઘેરી લીએ અને હું આપની પાસે હાજર ન હોઉં? ન તો મારી ફરિયાદ કે શિકાયત આપ સુધી પહોંચે? મૌલા મારી જાન આપ ઉપર કુરબાન, આપ એવા ગાયબ છો કે અમારાથી કદી જુદા નથી, મારી જાન આપ ઉપર કુરબાન કે નઝરથી દૂર છતાં અમારાથી દૂર નથી, મારી જાન આપ ઉપર કુરબાન આપ દરેક ચાહવાવાળાની તમન્ના અને દરેક મોમીન મોમેનાતની ઉમ્મીદ છો, જેઓ આપને યાદ કરીને ફરિયાદ કરે છે, મારી જાન આપ ઉપર કુરબાન કે આપ એવા ઇઝ્ઝતદાર છો કે જેમની બરાબરી કોઈ કરી શકતું નથી, મારી જાન આપ ઉપર કુરબાન આપ એવી બુઝુર્ગીના માલિક છો કે જેમની સરખામણી કોઈ સાથે થઇ શકતી નથી, મૌલા મારી જાન આપ ઉપર કુરબાન આપ એવી કિમતી નેઅમતોમાંથી છો કે જેની કોઈ મિસાલ નથી, મારી જાન આપ ઉપર કુરબાન આપ એવા શરફ અને બુઝુર્ગીવાળા છો જેમના જેવો બીજા કોઈ પાસે શરફ નથી, અય મારા મૌલા! ક્યાં સુધી આપના માટે બેચૈન રહું? અને કયા શબ્દોથી પુકારૂં? કઈ રીતે દિલની વાતોને આપથી બયાન કરૂં? મારા માટે કેટલું સખત છે કે આપના સિવાય બીજાઓ તો મને જવાબ આપે અને આપનો જવાબ ન સાંભળી શકું? કેટલું સખત છે કે હું તો આપને યાદ કરીને રડું અને લોકો આપને છોડી દે. કેટલું સખત છે મારા માટે આ બરદાશ્ત કરવું કે બધી મુસીબતો આપ ઉપર પડતી રહે અને બીજા મહેફૂઝ રહે, શું છે કોઈ સાથી કે જેના પાસે બેસીને આપ ઉપર રડું? શું કોઈ છે આપને યાદ કરીને ફરિયાદ કરનારો કે જ્યારે ફરિયાદ કરે તો હું પણ તેની સાથે જોડાઈ શકું? શું છે કોઈ એવી આંખ કે જે આપની જૂદાઈમાં બેચૈન હોય અને હું તેના સાથે ગમના આંસુ વહાવી શકું? અય ફરઝંદે અહમદ! શું કોઈ એવો રસ્તો છે કે જેથી આપ સાથે મુલાકાત થઇ શકે? શું આજનો દિવસ આપના કાલથી મળી શકશે? જેને જોઇને અમે ખુશ થશું? મૌલા તે સમય ક્યારે આવશે કે આપના હિદાયતના ઝરણાઓથી સયરાબ થઈશું? મૌલા ક્યારે આપના મીઠા ઝરણાઓથી સયરાબ થઈશું? જેથી આપના દીદારની તરસને બુજાવી શકીએ, મૌલા તરસનો સમય તો ઘણો લંબાઈ ગયો છે, તે સવાર અને સાંજ ક્યારે આવશે કે જેથી આપના દીદારથી અમારા દિલોને ઠંડક મળે? તો હવે ક્યારે આપ અમોને અને અમે આપના મુબારક ચહેરાને જોઈ શકીશું? કે જ્યારે આપની કામિયાબીનો પરચમ ફરકતો હશે, અને અમે આપણી ચારો તરફ હાજર હોઈશું, આપ તમામ લોકોના ઈમામ હશો, ત્યારે ઝમીન આપના વજુદથી અદલ અને ઇન્સાફથી ભરાઈ જશે, આપ દુશ્મનોને સખ્તી અને ઝીલ્લત સાથે હટાવી દેશો, મૌલા આપ સરકશોને હલાક અને હકનો ઇન્કાર કરનારાઓને નાબૂદ કરશો, ઝાલીમો તથા ઘમંડીઓને મૂળથી ઉખાડી ફેકશો, ત્યારે અમારી ઝબાન ઉપર હશે કે તમામ વખાણ તો ફક્ત અલ્લાહ માટે જ છે જે તમામ દુનિયાનો પાલનહાર છે. અય અલ્લાહ! તું જ ગમ અને પરેશાનીઓને દૂર કરનાર છે, તારી પાસે શિકાયત કરૂં છું, તું મદદગાર છે, તું દુનિયા અને આખેરતનો માલિક છે, અય ફરિયાદ કરનારાઓની ફરિયાદે પહોંચનાર, તારા આ મુસીબતમાં ઘેરાએલા બંદાની ફરિયાદને સાંભળ. અય મહાન કુદરતના માલિક! તારા આ બંદાને તેના મૌલા (ઈમામે ઝમાના અ.) નો દીદાર નસીબ કર, તેની પરેશાની, ગમ, દુઃખ અને તકલીફોને દૂર કર, તેના દિલમાં મૌલાની જુદાઈની આગને ઠંડી કરી સુકુન અતા કર, અય તમામ દુનિયાઓના હાકીમ! અય તે કે જેની તરફ બધાયને પાછું જવાનું છે અને તારા તરફ જ બધી વસ્તુનો અંત છે, ખુદાયા! અમે તારા મામુલી બંદા છીએ, અને તારા, ઝમાનાના વલી (ઈમામે ઝમાના અ.) ની ઝિયારતની તમન્ના રાખીએ છીએ, જેમનો ઝીક્ર તું અને તારા નબી સ. એ કર્યો છે, જેમને અમારા માટે પનાહગાહ, સહારો, તેમજ અમારી જીંદગી માટે વસીલો અને મદદગાર બનાવ્યો છે, તેમને મોમીનો માટે રહેબર અને ઈમામ બનાવ્યા છે, તો તું એમની ખીદમતમાં અમારા તરફથી સલામ પહોંચાડી આપ, અય પરવરદિગાર! અમારા મૌલા થકી અમારી ઇઝ્ઝતમાં વધારો કર, તેમના રહેવાની જગ્યાને અમારૂં રહેઠાણ અને અમારી મંઝીલ બનાવ, અમારા ઉપર તેમની ઈમામતના વાસ્તાથી નેઅમતોને મુકમ્મલ કર, જેથી અમને તારી જન્નતમાં તે શહીદો પાસે લઇ જાય જેમનો મરતબો ખુદાના બીલકુલ નજીક છે, અય મઅબુદ! હઝરત મોહંમદ સ. અને આલે મોહંમદ અ. ઉપર રહેમત નાઝીલ ફરમાવ. ઈમામે મહેદી અજ.ના નાના હઝરત મોહંમદ (સ.) ઉપર રહેમત નાઝીલ ફરમાવ, જે તારા રસુલ અને મહાન સરદાર છે, ઈમામે મહેદી અજ.ના પિતા ઉપર રહેમત નાઝીલ ફરમાવ જે નાના સરદાર છે, તેમની દાદી સીદ્દીકએ કુબરા ફાતેમા બીન્તે મોહંમદ સ. ઉપર રહેમત નાઝીલ ફરમાવ, તેમના તમામ લોકો ઉપર રહેમત નાઝીલ ફરમાવ જેમને તું તેમના નેક બુઝુર્ગોમાંથી પસંદ કરેલ છે, ઈમામે મહેદી કાએમ અજ. ઉપર રહેમત નાઝીલ ફરમાવ જે મુકમ્મલ, હંમેશા બાકી રહેનાર અને ખૂબ જ વધારે હોય, તેમના ઉપર એવી રહેમત નાઝીલ થાય કે જેની ગણત્રી કોઈ ન કરી શકે, જે હંમેશા બાકી રહે અને કોઈ દિવસ ખતમ ન થઇ શકે, અય અલ્લાહ! ઈમામે મહેદી અજ. થકી હકને કાયમ કર, બાતીલને ફના કર, તેમના થકી દોસ્તોને ઇઝ્ઝત અતા કર, અને દુશ્મનોને ઝલીલ કર, અય અલ્લાહ! અમારા અને ઈમામના દરમિયાન એવો સંબંધ કાયમ કર કે જેથી એમના પહેલાના બુઝુર્ગો સુધી પહોંચી શકીએ, અમારી ગણત્રી તેઓમાં કર કે જે લોકો તેમના દામનથી જોડાએલા છે, અને તેમના છાયામાં પનાહ અતા કર. ઈમામના હકો અદા કરવામાં અમારી મદદ કર, તેમની ફરમાબરદારીમાં કોશિષ કરવાની તૌફીક અતા કર, તેમની નાફરમાનીથી બચાવ, તેમની ખુશનુદી થકી અમારા ઉપર એહસાન કર, તેમની મોહબ્બત, રહેમત, દુઆ અને બરકત અતા કર, જેથી અમે તારી રહેમતો મેળવી શકીએ તથા તારા નજીક કામિયાબ થઇ શકીએ. બારે ઇલાહા! મારા ઈમામના વસીલાથી અમારી નમાઝોને કબૂલ કર, અમારા ગુનાહોને માફ કર, અમારી દુઆઓને કબૂલ કર, અમારી રોઝીમાં વધારો કર, અમારા ગમોને દૂર કર, અમારી હાજતોને પૂરી કર, અમારા તરફ તારી ખાસ નઝરે કરમ કર, અમારૂં તારી બારગાહમાં આવવું કબૂલ કર, અમારા તરફ એવી નઝરે કરમ ફરમાવ કે જેથી તારી બારગાહમાં અમારા માનમાં વધારો થઇ શકે, ત્યાર પછી ક્યારે પણ અમારા તરફથી તારી તે કરમની નઝરને ન હટાવી લે, અમને ઈમામે ઝમાના અજ.ના દાદા (ઈમામ અલી અ. ના મુબારક હાથે હૌઝે કૌસરના જામથી પૂરી રીતે સયરાબ કર, (તેઓ ઉપર અને તેમની ઔલાદ અ ઉપર ખુદાની રહેમત નાઝીલ ફરમાવ, ) જે એક એવું મીઠું, ઠંડું અને મનપસંદ પાણી હોય કે જેના પછી ફરી તરસનો એહસાસ ન થાય, અય રહેમ કરનારાઓમાં સૌથી વધારે રહેમ કરનાર.