دُعَاء كُمَيْل

શરૂં કરૂં છું અલ્લાહના નામથી જે રહમાન અને રહીમ છે અય મારા અલ્લાહ! તારાથી હું સવાલ કરૂં છું તે રહેમતના વાસ્તાથી જે દરેક વસ્તું ઉપર પથરાએલી છે, તને તારી તે શક્તિના વાસ્તાથી જે દરેક વસ્તું ઉપર કાબુ રાખે છે, અને જેના સામે દરેક વસ્તું પોતાને જૂકાવી દીધી છે, દરેક વસ્તું તેની સામે કિમત વગરની છે, તારી તે મોટાઈનો વાસ્તો કે જે દરેક વસ્તું ઉપર તાકત રાખે છે, તારી તે ઇઝ્ઝતનો વાસ્તો કે જેની કોઈ બરાબરી નથી કરી શકતું, તારી તે અઝમતનો (બુલંદી) વાસ્તો કે જે દરેક વસ્તુમાં સમાએલી છે, તારી તે બાદશાહતનો વાસ્તો કે જેની હુકુમત દરેક વસ્તુ ઉપર છે, તારી તે ઝાતનો વાસ્તો કે દરેક વસ્તું ફના થઇ જવા પછી પણ બાકી રહેશે, તારા તે નામોનો વાસ્તો કે જેનો અસર દરેક વસ્તુમાં છે, તારા તે ઇલ્મનો વાસ્તો કે જે દરેક વસ્તુની ખબર રાખે છે, તારી ઝાતના તે નૂરનો વાસ્તો જે દરેક વસ્તુને રોશન કરે છે. અય નૂર! અય પાક પાકીઝા અય બધાથી પહેલામાં પહેલો, અય બધાથી છેલ્લામાં છેલ્લો, અય અલ્લાહ! મારા તે ગુનાહોને માફ કર કે જે મારી ઇઝ્ઝતને બરબાદ કરે છે, અય અલ્લાહ! મારા તે ગુનાહોને માફ કર કે જેનાથી બલાઓ નાઝીલ થાય છે, અય અલ્લાહ મારા તે ગુનાહોને માફ કર કે જેનાથી નેઅમતો ખતમ થઇ જાય છે, અય અલ્લાહ મારા તે ગુનાહોને માફ કર કે જેનાથી મારી દુઆઓ કબૂલ થતી નથી, અય અલ્લાહ મારા તે ગુનાહોને માફ કર કે જેનાથી મુસીબતો ઉતરે છે, અય અલ્લાહ મારા તે ગુનાહોને માફ કર કે જેનાથી મારી ઉમ્મીદો પૂરી થતી નથી, અય અલ્લાહ મારા તે ગુનાહોને માફ કર કે જે મેં જાણી જોઇને યા ભૂલથી કર્યા હોય. અય અલ્લાહ! તારી યાદથી તારી નજીક થવા ચાહું છું અને તેનાથી તારી બારગાહમાં શફાઅતની ઉમ્મીદ રાખું છું, તને તારા કરમનો વાસ્તો આપીને સવાલ કરૂ છું કે મને તારી નજદીકી અતા કર, તારો શુક્ર કરવાની મને તૌફીક અતા કર, મારા દિલને તારી યાદથી ભરી આપ, અય અલ્લાહ! હું તારી સામે એ માણસની જેમ સવાલ કરૂં છું કે જે નમ્રતાથી, આજીજી કરીને અને રોઈ રોઈને તને પૂકારતો હોય, તો તું મારી ભૂલચૂકને માફ કર, મારા ઉપર રહેમ કર, મારી કિસ્મતમાં જે મારા માટે ભાગ નક્કી કર્યો છે તેના ઉપર રાજી, સંતોષી રહું અને હર હાલતમાં સુકુન અતા કર, દરેક હાલતમાં તારી સામે આજીઝી કરનાર બંદો બનાવ, અય અલ્લાહ! તારાથી એવા માણસની જેમ સવાલ કરૂ છું કે જેના પર ભૂખ અને ફાકાની મુસીબતો ગુજરતી હોય, જે મુસીબતોથી તંગ આવીને તારી સામે પોતાની જરૂરતો પેશ કરતો હોય, અને તારાથી વધારેમાં વધારે આશા રાખતો હોય. અય અલ્લાહ! તારી બાદશાહત બહું જ મોટી છે, તારો મરતબો ઘણો જ બુલંદ છે, તારી મસ્લેહત અમારી સમજથી દૂર છે, તારો હુકમ સાફ જાહેર છે, તારો અઝાબ સખત, તારી કુદરત જારી છે, તારી હુકુમતથી ભાગવાનો કોઈ રસ્તો નથી, અય અલ્લાહ! મારા ગુનાહોને માફ કરનાર, મારા ખરાબ કામોને છુપાવનાર, તેમજ મારા ખરાબ કામોને સારા કામોથી બદલી આપનાર તારા સિવાય બીજું કોઈ નથી, તારા સિવાય બીજો કોઈ મઅબુદ નથી, તું પાક છે અને તારા જ વખાણ કરૂં છું, ગુનાહો કરીને મારા નફસ ઉપર ઝૂલ્મ કર્યો છે, મારી નાદાનીના લીધે (ગુનાહોની) મોટી હિંમત કરી છે, આ વિચારીને મુતમઈન થઇ ગયો કે તારા એહસાનો હંમેશા મારા ઉપર રહ્યા છે. અય અલ્લાહ! અય મારા માલિક! તુંએ મારા કેટલાય ગુનાહોને છુપાવ્યા, તુંએ મને કેટલી સખત બલાઓથી બચાવ્યો, તુંએ મને કેટલી ભૂલોથી બચાવ્યો, તુંએ મને કેટલી સખત આફતોથી બચાવ્યો, અને કેટલી એવી ખૂબીઓ કે જેનો હું બિલકુલ લાયક ન હતો લોકો સામે બયાન કરી, અય અલ્લાહ! મારી મુસીબત વધી ગઈ છે, મારી હાલત એકદમ ખરાબ છે, મારા નેક અમલ બહુ જ ઓછા છે, મારા ગુનાહોના લીધે મારા હાથ ગરદનથી બંધાઈ ગયા છે, મારી લાંબી લાંબી ઉમ્મીદોએ મને લાભથી દૂર રાખ્યો છે, દુનિયાની ખોટી ચમક દમકે મને દગો આપ્યો છે, અને મારૂં નફસ પણ મારા ગુનાહોના લીધે મને દગો આપ્યો છે. અય મારા અલ્લાહ! તને તારી ઇઝ્ઝતનો વાસ્તો આપીને સવાલ કરૂં છું કે મારા ખરાબ આમાલ અને ખરાબ કામો, મારી દુઆ કબૂલ થવામાં રૂકાવટ ન બને, જે મારા છૂપા કામોને તું જાણે છે તેના લીધે મને ઝલીલ (બેઈઝ્ઝત) ન કર, જે એકાંતમાં બુરાઈ, ગુનાહ, કોતાહી કરી છે, જે મારી નાદાની, વધુ પડતી ખ્વાહિશો તેમજ ગફલતના લીધે જે ગુનાહો કર્યા છે તેની સજા દેવામાં જલ્દી ન કર, અય અલ્લાહ ! તારી ઇઝ્ઝતના વાસ્તાથી હર હાલમાં મારા ઉપર રહેમ ફરમા, દરેક હાલતમાં મારા ઉપર મહેરબાની કર, અય મારા મઅબુદ ! મારા પરવરદિગાર ! તારા સિવાય બીજું કોણ છે કે જેના સામે મારી મુસીબતો દૂર કરવાનો અને મારા કામો તરફ નજર કરવાનો સવાલ કરૂં? અય મારા અલ્લાહ ! તુંએ જેનો હુકમ આપ્યો તેની મેં નાફરમાની કરી, તારો કોઈ ખયાલ ન કર્યો, તેમાં મારી મનમાની કરી, મારો દુશ્મન (શયતાને) મારી સામે નફ્સની ખ્વાહીશાતને શોભીતી બનાવી, તેનો હું કોઈ બચાવ ન કરી શક્યો, આ રીતે મને ખ્વાહીશાતની જાળમાં ફસાવી દીધો, આમાં મારી નસીબે પણ તેની મદદ કરી, આ રીતે હું તારી અમુક હદોને તોડી અને તારા અમુક હુકમની નાફરમાની કરી, હર હાલમાં તું જ વખાણનો લાયક છે, મારા માટે તારો જે ફેસલો છે, અને તારો હુકમ અને ઈમ્તેહાન જે મારા માટે હતું તેની સામે મારી પાસે કોઈ દલીલ નથી. અય મારા અલ્લાહ! મારી કોતાહી અને મારા નફસ ઉપર (ગુનાહો) કરીને ઝૂલ્મ કર્યો છે, તેની માફી માંગવા માટે તારી સામે હાજર થયો છું, જે કર્યું તેના ઉપર શરમિંદા છું, અફસોસ અને પછતાવો કરૂં છું, ખરાબ કામોથી દુર થાઉ છું, માફીની ઉમ્મીદ રાખું છું, તારી બક્ષિશની આશા રાખું છું, રોઈ રોઈને હું મારા ગુનાહોને કબૂલ કરૂં છું, જે કઈ કર્યું છે તેનાથી ભાગવાનો કોઈ રસ્તો નથી, ન તો કોઈ એવી જગ્યા છે કે જ્યાં મારી વાતોને બયાન કરૂં, સિવાય તારા કે તું મારા ગુનાહોને માફ કર, તારી વિશાળ રહેમતમાં દાખલ કર, તો અય મારા માઅબુદ મારી માફીને કબૂલ કર, મારી તકલીફની સખ્તી ઉપર રહેમ ફરમાવ, મારી મુસીબતોમાં નજાત અતા કર, અય મારા અલ્લાહ! તું મારા નબળા શરીર, નાજુક ચામડી અને કમઝોર હાડકા ઉપર રહેમ કર, અય તે મહેરબાન ખુદા કે જે મને પૈદા કર્યો, દરેક રીતે મારો ખયાલ રાખ્યો, મારી પરવરીશની બધી સગવડો કરી, મારા હકમાં હંમેશા સારૂ કર્યું, મને રોઝી આપી, પહેલાં જે રીતે તું મારા ઉપર મહેરબાની કરી છે, અને મારા હકમાં સારૂ કર્યું છે તે રીતે જ તારા ફઝલો કરમને મારા માટે હંમેશા જારી રાખ. અય મારા અલ્લાહ! અય મારા પરવરદિગાર! અય મારા માઅબુદ! હું અજબ થાઉ છું કે શું તું મને જહન્નમમાં નાખીશ? જ્યારે કે હું તારી તૌહીદને કબુલ કરૂં છું, મારૂં દિલ તારી મારેફત થી ભરેલું છે, મારી ઝબાન ઉપર હંમેશા તારો ઝીક્ર રહે છે, મારા દિલમાં તારી મોહબ્બત વસી ગઈ છે, હું તને મારો પરવરદિગાર માનીને સાચા દિલથી તારી સામે મારા ગુનાહોનો ઈકરાર કરૂં છું, અને રોઈ રોઈને તારી પાસે ફરિયાદ કરૂં છું, તે છતાં શું તું અઝાબમાં નાખીશ? ના, આવું મુમકીન નથી, કેમ કે તારી મહેરબાની તો આનાથી બહુ જ વધારે છે કે જેને મોટો કર્યો હોય તેને જ બરબાદ કરે, યા જેને નજીક કર્યો હોય તેને દૂર કરે, યા જેને તું આશરો આપ્યો હોય તેને કાઢી મુકે? યા જેની મદદ કરી હોય અને જેના ઉપર રહેમ કર્યો હોય તેને મુસીબતોમાં નાખે? આ વાત મારી સમજ બાહર છે, અય મારા સરદાર! અય મારા અલ્લાહ! અય મારા મૌલા! શું તું એવા ચહેરાને જહન્નમમાં નાખીશ કે જે તારી બુઝુર્ગીના સામે સજદા કરે છે? શું તે ઝબાનને જહન્નમમાં નાખીશ કે જે તારી તૌહીદનો સાચા દિલથી ઈકરાર કરે છે, તથા શુક્ર સાથે તારા વખાણ કરે છે? શું તે દિલો ઉપર અઝાબ કરીશ કે જે તને ઇબાદતના લાયક સમજે છે? શું એ દિમાગ ઉપર અઝાબ કરીશ કે જે તારી મારેફતના લીધે તારાથી ડરે છે? શું એ શરીરના હાથ, પગ, ઉપર અઝાબ કરીશ કે જે તારી ઇતાઅતમાં તારી ઇબાદતગાહો તરફ દોડે છે? તથા ગુનાહોનો ઈકરાર કરીને તારી પાસે માફી માંગે છે, શું તેમને તું દોઝખની આગમાં નાખીશ? તારાથી આવી ઉમ્મીદ નથી, ન તો તારા ફઝલ અને મહેરબાનીના મુનાસીબ છે. અય કરીમ ! અય રબ! દુનિયાની થોડીક તકલીફો સામે મારી કમઝોરીને તું સારી રીતે જાણે છે કે દુનિયાની મુસીબતોને મારામાં સહન કરવાની તાકત નથી, જ્યારે કે આ દુનિયાની બલા અને મુસીબત ઓછી છે અને તેની મુદ્દત ટૂંકી છે, તો પછી કેવી રીતે આખેરતની બલા અને મુસીબતોને ખમી શકીશ? કે જેનો અઝાબ બહુ જ વધારે દર્દનાક છે, તે એવો અઝાબ છે કે જેની મુદ્દત બહુ જ લાંબી અને હંમેશા રહેવાવાળી છે, જેમાં કંઈ ઓછું થશે નહિ, કેમ કે તે બલા અને અઝાબ નથી બલકે તારો ગુસ્સો અને ગઝબ છે, મારા ગુનાહોનો બદલો અને તારી નારાઝગી છે, તે એવો ગુસ્સો છે કે જેને ન તો ઝમીન સહન કરી શકે છે કે ન તો આસમાન, તો અય મારા અલ્લાહ! ત્યારે મારી કેવી હાલત થશે જ્યારે કે હું તો તારો કમઝોર, ઝલીલ, મામુલી, મિસ્કીન અને લાચાર બંદો છું, અય મારા મઅબુદ! અય મારા પાલનહાર! અય મારા સરદાર! અય મારા મૌલા! હું તારી સામે કયા કયા કામોની ફરિયાદ કરૂં? કઈ કઈ વસ્તુઓ માટે રોવું? શું દર્દનાક અઝાબ અને તેની સખ્તી ઉપર રોઉં કે પછી તેની લાંબી અને બાકી રહેવા વાળી મુસીબતો ઉપર રોઉં? તું મને તારા દુશ્મનો સાથે અઝાબ કરીશ? યા જે લોકો તારા અઝાબના હકદાર છે તે લોકો સાથે અઝાબ કરીશ? યા મારી તારા દોસ્તો અને અવલીયાના વચમાં જુદાઈ નાખીશ? અય મારા મઅબુદ! અય મારા સરદાર! અય મારા મૌલા! અય મારા પાલનહાર! માની લે કે હું તારા અઝાબને તો સહન કરી લઉં પરંતુ તું જ મને બતાવ કે તારી રહેમતની જુદાઈને કેમ સહન કરૂં? અગર તારી જહન્નમની આગ ઉપર સબર પણ કરી લઉં તો તું જ મને બતાવ કે તારી રહેમતની જુદાઈ ઉપર કેમ સબર કરૂ? જો હું જહન્નમની આગને સહન કરી લઉં તો તું જ મને બતાવ કે તારી રહેમો કરમથી કેવી રીતે દૂર રહી શકું? કેવી રીતે હું આગમાં પડ્યો રહું જ્યારે કે તારાથી મહેરબાની અને માફીની ઉમ્મીદ છે, અય મારા સરદાર! અય મારા આકા! તારી ઈઝ્ઝતની કસમ ખાઈને કહું છુ કે જો તું મારી બોલવાની તાકતને બાકી રાખીશ તો જહન્નમીઓના વચ્ચે તારૂં નામ લઈને તને એ રીતે પૂકારીશ કે જેવી રીતે તારાથી ઉમ્મીદ રાખનાર પૂકારે છે, તારી સામે એ રીતે ફરિયાદ કરીશ કે જેવી રીતે ફરિયાદી મદદ માટે બૂમો પાડે છે, તારી રહેમતની જુદાઈમાં એ રીતે રડીશ કે જેવી રીતે કોઈ નાઉમ્મીદ થવાના કારણે રોવે છે, અને હું જરૂર અવાઝ આપીશ કે ક્યાં છો અય મોમીનોના દોસ્ત, અય ઓળખનારાઓની ઉમ્મીદોને પૂરી કરનાર, અય ફરિયાદીઓની ફરિયાદે પહોંચનાર, અય સાચાઓથી મોહબ્બત કરનાર, અય તમામ દુનિયાઓના પરવરદિગાર, તું પાક પાકીઝા છે, અય મારા માબુદ! હું ફક્ત તારા જ વખાણ કરૂં છુ, શું તું જોઈ શકીશ? જ્યારે કે દોઝખની આગમાંથી એક મુસલમાન બંદાની ચીખો પૂકારને સાંભળતો હોય જે તારી નાફરમાનીના લીધે તેમાં કૈદ છે, જે તેમાં પોતાના ગુનાહોની સજા ચાખી રહ્યો છે, જે ગુનાહોના કારણે દોઝખની વચમાં બંધ કરવામાં આવ્યો છે, તે તારી રહેમતની આશામાં રડી રડીને ફરિયાદ કરતો હશે, એક મુસલમાનની જેમ તને પૂકારતો હશે, તારા રબ હોવાનો વાસ્તો આપીને અવાઝ આપતો હશે, અય મારા આકા! ત્યારે તે કેવી રીતે અઝાબમાં રહેશે? જ્યારે કે તે તારી હંમેશાની મહેરબાનીની જેમ આશા રાખે છે, યા દોઝખની આગ તેને કેવી રીતે તકલીફ પહોંચાડશે? જ્યારે કે તે તારી મહેરબાનીની ઉમ્મીદ રાખે છે, યા જહન્નમના ભડકા તેને કેવી રીતે સળગાવી શકશે? જ્યારે કે તું પોતે જ તેની ફરિયાદને સાંભળતો હશે અને અઝાબને જોતો હશે, યા જહન્નમની ચીખો પૂકાર તેને કેવી રીતે નુકસાન પહોંચાડી શકે? જ્યારે કે તું તેની કમઝોરીને બહેતર રીતે જાણે છે, યા જહન્નમની આગમાં કેવી રીતે તડપતો રહેશે? જ્યારે કે તું તેની હકીકતને સારી રીતે જાણે છે, યા જહન્નમની આગ તેને કેવી રીતે તકલીફ આપશે? જ્યારે કે તે તને પુકારતો હશે, અય મારા માલિક! અય મારા પાલનહાર! શું આવું બની શકે કે તે તો તારી પાસે જહન્નમની આગથી નજાત માટે તારાથી ઉમ્મીદ રાખતો હોય અને તું તેને જહન્નમમાં રહેવા દે? ના, આવું શક્ય નથી, ન તો તારા વિષે આવો કોઈ વિચાર કરી શકે, ન તો પહેલા આવું કોઈ વખત બન્યું છે, અને ન તો તારી મહેરબાનીથી આવું શક્ય છે, જે તૌહીદવાળા સાથે કરે છે, તે માટે હું પુરા યકીન સાથે કહું છું કે જો તું તારા મુન્કીરોને અઝાબ દેવાનો હુકમ ન કર્યો હોત અને તારા દુશ્મનોને હંમેશા જહન્નમમાં રાખવાનો ફેસલો ન કર્યો હોત તો જરૂર જહન્નમની આગને ઠંડી કરીને સલામતીની જગ્યા બનાવી દેત અને તેમાં કોઈને પણ દાખલ ન કરત, પરંતુ તારા પાક નામોની કસમ ખાધી છે કે તમામ કાફિર જીન્નાતો તથા ઇન્સાનો અને તારા દુશ્મનોને દોઝખમાં જ હંમેશા માટે રાખીશ. બસ તમામ વખાણ તો ફક્ત તારા માટે જ છે, તારા બંદાઓ ઉપર એહસાન અને મહેરબાનીથી પહેલા જ ફરમાવ્યું છે કે શું મોમીન અને ફાસીક બરાબર થઇ શકે? ક્યારે પણ નહિ, અય મારા અલ્લાહ! અય મારા સરદાર! હું વાસ્તો આપું છું તારી તે કુદરતનો કે જેનાથી તારી મખલુકની તકદીર લખી, તારા તે જરૂરી ફૈસલાનો કે જેને તું લાગુ કર્યા, તેમજ તેમના ઉપર તારોજ હુકુમ ચાલે છે, તેના વાસ્તાથી તારી બારગાહમાં ઈલ્તેજા કરૂં છું કે તે દરેક ભૂલ કે જે મારાથી થઇ હોય, તે દરેક ગુનાહ કે જે મારાથી થયા હોય તેને માફ કર, દરેક તે બુરાઈ કે જે છૂપાઈને કરી હોય, યા દરેક તે ભૂલો કે જે મારી નાદાનીના લીધે થઇ હોય, ચાહે તેને હું છૂપાવી હોય કે જાહેર, આજની રાત્રે અને ખાસ કરીને આ કલાકમાં માફ કર, તે બધાજ ગુનાહો માફ કર કે જેને તારા બે ફરિશ્તા કેરામન કાતેબીનને લખવા માટે નક્કી કર્યા છે, જે મારા દરેક અમલને લખે છે, તેમજ મારા શરીરના અંગો તે ગુનાહોના ગવાહ છે, તે સિવાય તું પોતે પણ મારા ગુનાહોને જાણે છે, તને તો તે બધી વાતો ખબર છે કે જે વાતો તારા ફરિશ્તાઓ પણ નથી જાણતા, પરંતુ તારી મહેરબાનીથી તેને છૂપાવે છે, (તે તમામ ગુનાહો, ભૂલોને માફ કર,) અય અલ્લાહ! તારી પાસે સવાલ કરૂં છું કે મને વધારેમાં વધારે હિસ્સો અતા કર કે જે ભલાઈ તારા તરફથી નાઝીલ થાય, યા દરેક તે એહસાન કે જે તારી મહેરબાનીથી અતા કરે, યા દરેક તે નેકી કે જેને તું ફૈલાવે, યા દરેક તે રોઝી કે જેમાં તું વધારો કરે, યા દરેક તે ગુનાહની માફીમાં કે જેને તું માફ કરે, યા દરેક તે ભૂલો કે જેને તું છૂપાવે છે અય મારા પાલનહાર! અય મારા પરવરદિગાર! અય મારા અલ્લાહ! અય મારા અલ્લાહ! અય મારા સરદાર! અય મારા મૌલા! અય મારી આઝાદીના માલિક! અય તે કે જેના હાથમાં મારી તકદીર છે, અય મારા નુકસાન અને મોહતાજીના જાણકાર, અય મારી ફકીરી અને ભૂખની ખબર રાખનાર. અય મારા પાલનહાર! અય મારા પરવરદિગાર! અય મારા અલ્લાહ!. તને તારી પાકીઝગી, તારી મહાન સીફતો અને તારા મુબારક નામોના વાસ્તાથી સવાલ કરૂ છું, કે મારા રાત દિવસને તારી યાદથી ભરી આપ, જેથી તારી ફરમાબરદારીમાં પસાર થાય, મારા આમાલને તારી બારગાહમાં કબુલ કર, જેથી મારા આમાલ અને મારો ઝીક્ર એકજ થઇ જાય, અને હંમેશા તારી ઇતાઅતમાં મશગુલ રહું, અય મારા સરદાર ! અય તે ઝાત કે જેના ઉપર મને ભરોસો છે, અને મારી દરેક હાલની ફરિયાદ કરૂં છું. અય મારા પાલનહાર! અય મારા પરવરદિગાર! અય મારા અલ્લાહ! મારા શરીરના ભાગોને તારી ઇતાઅત માટે મજબૂત કર, મારા દિલને નેક ઈરાદા ઉપર બાકી રહેવાની શક્તિ અતા કર, મને તૌફીક અતા કર કે હંમેશા તારાથી ડરતો રહું અને તારી ઇતાઅતમાં લાગેલો રહું, જે લોકો તારી નજીક થવા માટે જલ્દી કરી રહ્યા છે તેમાં હું પણ જલ્દી કરૂં, તારી ખિદમત માટે જે લોકો ઉતાવળ કરી રહ્યા છે તેવા તારા મુખલીસ બંદાઓની જેમ હું પણ તારી તરફ ઉતાવળ કરૂં. એવો શોખ મારામાં પૈદા કર, તારા ઉપર યકીન રાખનારની જેમ બહુ જ ડરતો રહું, અને જ્યારે તારી બરગાહમાં મોમીનો ભેગા થાય ત્યારે હું પણ હંમેશા હાજર રહું. અય મારા અલ્લાહ! જે કોઈ મારાથી ખરાબ વર્તાવ કરે તો તું પણ તેની સાથે એવો જ વર્તાવ કર, જે કોઈ મારાથી દગો કરે તો તું જ તેને સઝા કર, મારી ગણત્રી તે નેક લોકોમાં કર કે જેઓ તારાથી વધારે ફાયદો ઉઠાવે છે, તારી નજીક જેમનો મરતબો બૂલંદ છે, જેમનો દરજ્જો તારી બારગાહમાં ખાસ છે, આવો ખાસ મરતબો તારી મહેરબાની સિવાય બીજા કોઈને નથી મળી શકતો, તારી બુઝુર્ગી પ્રમાણે મારા ઉપર મહેરબાની કર, તારી રહેમતના વાસ્તાથી મારી હિફાઝત કર, મારી ઝબાન ને હંમેશા તારા ઝીક્રમાં મશગુલ રાખ, અય અલ્લાહ મારા દિલને તારી મોહબ્બતની મીઠાસ અતા કર, મારી દુઆઓ કબુલ કરી મારા ઉપર મોટો એહસાન કર, મારામાં જે બૂરાઈઓ છે તેને દૂર કર અને મારી ભૂલોને માફ કર, તું જ તારા બંદાઓને તારી બંદગી કરવાનો હુકમ કર્યો છે અને દુઆને કબુલ કરવાનો ઝામીન થયો છે, માટે અય પરવરદિગાર હું તારી પાસે મદદ માટે હાથ ફેલાવ્યા છે, બસ તને તારી ઇઝ્ઝતનો વાસ્તો છે કે મારી દુઆ કબુલ કર, મારી તમન્નાઓ પૂરી કર, તારી મહેરબાનીથી મને નાઉમ્મીદ ન કર, જીન્નાત તથા ઇન્સાનોમાંથી જેટલા જેટલા મારા દુશ્મનો છે તેમની તકલીફથી મને બચાવ. અય બંદાથી જલ્દી રાઝી થવાવાળા, માફ કર તે બંદાને કે જેના પાસે દુઆ સિવાય બીજો કોઈ સહારો નથી, તું જે ચાહે કરી શકે છે, તારૂં નામ દવા અને તારો ઝીક્ર દરેક બીમારી માટે શફા, તારી ઇતાઅત લોકોની મોહતાજીથી બચાવનાર છે, તે બંદા ઉપર રહેમ કર કે જેની પુંજી તારો સહારો અને જેનું હથિયાર રડવું છે, અય નેઅમતો આપનાર! અય બલાઓ દૂર કરનાર! અય અંધારામાં ડરનારને રોશની આપનાર, અય એવો આલીમ કે જે કોઇથી શીખ્યો નથી, અય અલ્લાહ! તું મોહમ્મદ સ. અને આલે મોહમ્મદ અ. ઉપર રહેમત નાઝીલ ફરમાવ, મારી સાથે એવો વર્તાવ કર કે જે તને લાયક છે, અલ્લાહ સુબહાનહુ વ તઆલા રસુલ હઝરત મોહમ્મદ મુસ્તુફા સ. તથા પાક ઇમામો અ. ઉપર કે જે એમની ઔલાદમાંથી છે દુરૂદો સલામ મોકલે છે, એવા સલામ કે જે મોકલવાનો હક છે, બહુ જ ઘણા ઘણા સલામ